Bahnstieg Blaa Buchkatalog

An een Summerabend kümmt Andres Tollsen vun sien Arbeid na Huus. De heele Familie freit sik op de Ferienreis, de glieks an neegsten Dag loosgahn schall. Man dat kümmt allns ganz anners. Noch vör Dau un Dag warrt Andres vun sien Fruu weckt. Beide mööt ut'n Huus flüchten. Ünnerwegens veräät se em, dat se eegens 'n Hex is un dat se ut'n anner Welt kümmt. Man, dat is nich allns, wat Andres verknusen mutt. He kriegt to weeten, dat sien Welt mit dree Blangenwelten (Paralleluniversen) verbunden is. Leeder gifft dat 'n Koppel Töverers, de in allen Blangenwelten de Macht an sik rieten un allns na ehrn Willen ümkrempeln wüllt. Dat Schicksaal vun allen Welten liggt nu in den Hännen vun sien Fruu un em. Tosamen beleevt se veele Aventüürs, lehrt Götterwesen kennen, un uk ehre Kinners speelt in disse Fantasigeschich noch een wichtig Rull.